Որոնում:

ԼՂՀ ԱԳՆ ղեկավարն ընդունել է Հունաստանի Համապոնտական դաշնության անդամներին - MFA NKR

ԼՂՀ ԱԳՆ ղեկավարն ընդունել է Հունաստանի Համապոնտական դաշնության անդամներին


2016-04-22 18:25

Ապրիլի 22-ին Լեռնային Ղարաբաղի Հանրապետության  արտաքին գործերի նախարար Կարեն Միրզոյանն ընդունել է ճանաչողական այցով Արցախ ժամանած Հունաստանի Համապոնտական դաշնության անդամներին։

Կարեն Միրզոյանը ողջունել է Համապոնտական դաշնության անդամների այցը ԼՂՀ որպես հայ-հունական ավանդական բարեկամական հարաբերությունների դրսևորում և ընդգծել դրա կարևորությունը Արցախի քաղաքական, կրթական, մշակութային և սոցիալական կյանքին ծանոթանալու առումով։

Հանդիպման ընթացքում Կարեն Միրզոյանը ներկայացրել է  ադրբեջանա-ղարաբաղյան հակամարտության խաղաղ կարգավորման գործընթացում ստեղծված իրավիճակը, անդրադառնալով ապրիլի 2-5 Ադրբեջանի կողմից ԼՂՀ դեմ սանձազերծված լայնածավալ  ռազմական ագրեսիայի և դրա հետևանքներին։ Այս կապակցությամբ ԼՂՀ ԱԳՆ ղեկավարը նշել է, որ Ադրբեջանի զինված ուժերի կողմից իրականացված ռազմական հանցագործությունները իրենց դաժանությամբ չեն տարբերվում մեկ դար առաջ Օսմանյան Կայսրությունում քրիստոնյաների դեմ իրականացված ցեղասպանությունից։

Հանդիպման ընթացքում կողմերը մտքեր են փոխանակել Հունաստանի Համապոնտական դաշնության և Արցախի, մասնավորապես նրա հույն համայնքի միջև կապերի հաստատման հնարավորությունների և հեռանկարների շուրջ։

Արտաքին գործերի նախարարություն
Լեռնային Ղարաբաղի Հանրապետություն
ԼՂՀ, Ստեփանակերտ, Ազատամարտիկների 28
Հեռ: (+374 47) 9 44087,
Ֆաքս: (+374 47) 9 71551, Web: www.nkr.am
Բոլոր իրավունքները պահպանված են. © 2008
Ստեղծված է Ghazanchyan.com